Tá sé fógartha ag an Údarás Náisiúnta Iompair (ÚNI) gurb é Nasc Áitiúil TFI na Gaillimhe an tseirbhís Nasc Áitiúil is déanaí chun íocaíochtaí cárta gan tadhall a thabhairt isteach, rud a thugann solúbthacht agus áisiúlacht níos fearr do phaisinéirí agus iad ag íoc as a dturais.
Is féidir le paisinéirí atá ag taisteal ar sheirbhísí Nasc Áitiúil TFI na Gaillimhe tapáil anois go simplí ag baint úsáid as a gcárta dochair nó a gcárta creidmheasa, nó roghanna íocaíochta móibíleacha ar nós Apple Pay nó Google Pay a roghnú. Cuireann an cur i bhfeidhm seo rogha eile níos tapúla, níos éasca agus níos áisiúla ar fáil do chustaiméirí chun íoc as turais shingile.
Cuireann tabhairt isteach íocaíochtaí gan tadhall i nGaillimh leis an gclár píolótach rathúil i gCabhán agus i Muineachán agus tagann sí sna sála ar íocaíochtaí gan tadhall a cuireadh i bhfeidhm i roinnt seirbhísí eile de chuid Nasc Áitiúil TFI eile ar fud na tíre. Ós rud é gurb í Gaillimh an seachtú hOifig Nasc Áitiúil TFI chun íocaíochtaí gan tadhall a thabhairt isteach, tá an clár beagnach leath bealaigh tríd an rolladh amach náisiúnta anois. Léiríonn an leathnú leanúnach aiseolas láidir ó phaisinéirí agus tiomantas an ÚNI chun roghanna íocaíochta nua-aimseartha, atá furasta le húsáid a sholáthar d’úsáideoirí iompair phoiblí tuaithe agus réigiúnaigh.
Tá an íocaíocht gan tadhall ar fáil faoi láthair le haghaidh táillí turais aonair. Leanfaidh táirgí táillí laethúla agus seachtainiúla de bheith ar fáil trí shuíomh gréasáin Leap agus Aip Leap Top‑Up TFI. Tá cártaí Leap TFI, íocaíochtaí airgid thirim agus Cártaí Saorthaistil fós bailí lena n-úsáid ar gach seirbhís incháilithe Nasc Áitiúil TFI.
Is cuid de chlár leanúnach ÚNI í an fhorbairt seo chun córais táillí iompair phoiblí a nuachóiriú ar fud na tíre, agus cuirtear béim ar leith inti ar inrochtaineacht agus eispéireas an phaisinéara a fheabhsú i bpobail tuaithe agus réigiúnacha.
Dúirt Edmund Betagh, Bainisteoir Cláir Nasc Áitiúil TFI ag an ÚNI:
“Is céim thábhachtach eile i nuachóiriú íocaíocht táillí ar fud seirbhísí tuaithe agus réigiúnacha é cur i bhfeidhm íocaíochtaí gan tadhall chuig Nasc Áitiúil TFI na Gaillimhe. Agus Gaillimh anois ar an seachtú ceann de 15 Oifig Nasc Áitiúil TFI chun an teicneolaíocht seo a thabhairt isteach, táimid beagnach ag leath bealaigh an chláir náisiúnta. Léiríonn an dul chun cinn seo glacadh láidir ag paisinéirí agus ár bhfócas leanúnach ar roghanna íocaíochta simplí, solúbtha agus inrochtana a chur ar fáil a fheabhsaíonn an taithí taistil laethúil do phobail ar fud na hÉireann.”
Dúirt Bainisteoir Ginearálta Nasc Áitiúil TFI Gaillimh, Joe Greally:
“Is forbairt an-dearfach í tabhairt isteach íocaíochtaí gan tadhall do phaisinéirí a úsáideann seirbhísí Nasc Áitiúil TFI na Gaillimhe. Déanann sé taisteal níos éasca agus níos áisiúla, go háirithe d’úsáideoirí ócáideacha agus do chuairteoirí, agus cuireann sé go mór leis na roghanna íocaíochta atá ann cheana féin. Tacaíonn an t-uasghrádú seo lenár n-obair leanúnach chun seirbhísí bus áitiúla a neartú ar fud an chontae agus a chinntiú go leanann iompar poiblí i nGaillimh de bheith iontaofa, inrochtana agus dírithe ar riachtanais na bpobal a bhfreastalaímid orthu.”
Chun tuilleadh eolais a fháil faoi sheirbhísí TFI Naisc Áitiúil i nGaillimh, tabhair cuairt anseo: https://www.locallinkgalway.ie/